香港新浪網 MySinaBlog
« 上一篇 | 下一篇 »
小彭 | 18th Dec 2005 | 我寫故我在 | (4105 Reads)

星期六晚的催淚彈清場事件,睇到好多香港人的醜態,原來好多香港人都好似古巨基---咁「白痴」、好似鄭中基---咁「無賴」。

Picture

班南韓佬唔係人咁品,佢地未來香港前大家已經知道,警察阻佢地去路,必有衝突發生。

但香港人唔知係真心支持,定係潛意識裡真係好鬼鐘意趁熱鬧,每次衝突時,都有一大批不怕死的香港人夾雜在中間,時而吶喊助威,時而拍照留念。

到清場當晚就更加誇張,自從示威者衝左出軒尼詩道之後,大批香港人就好似中左邪咁跟0係後面,跟到去港灣道。到左夜晚,示威者已經黎哂,香港人仍然源源不絕,都幾肯定,當時香港人仲多過示威者!

李少光都講左,警察會有果斷行動,叫市民離開灣仔。果斷者,當然唔會係繼續用胡椒噴霧咁簡單,放催淚彈,係必然的結果!但香港人仍然死都唔走,仍然吶喊助威,仍然拍照留念,見到警察調動就追住警察狂影一番,見到示威者一郁,又跟住上去狂拍一輪,成個灣仔的香港人,頓時進入亢奮狀態!!

當第一個催淚彈一放,香港市民先如夢初醒,拚命逃走,但已太遲,紛紛中招,人地南韓示威者,一早已經戴上口罩,用濕毛巾蒙面!

無賴既係,之後竟然有人話警察用過份武力,點解示威咁和平都要用催淚彈;放催淚彈前點解唔單聲;點解用催淚彈對付香港人;點解有細路仔0係度都放催淚彈;點解要拘捕示威者,要求無條件放人...

香港人呀香港人,示威者要公民抗命,要表達意見,要衝擊警察防線,係預左比人拉,預左付出代價,作好受傷的準備。我地記者要採訪,亦冇得揀,要走到最前,預左被牽連,公司係同記者買左保險的。你班白痴仔,星期六晚唔去睇King Kong,拖男帶女走來趁熱鬧,仲要鬧記者好阻住你地睇show,咁就好應該有心理準備,你唔會以為有人跳舞,就真係開緊嘉年華下嘩?!吸到催淚氣大嘔特嘔,先知驚,先知走避,先知後悔,呢D咪叫做抵X死囉!

好啦,既然做左白痴咯,係我既就會收下把口,唔敢話比人知我做左白痴。點知仲有人大大聲聲鬧差人,鬧政府,呢D咪叫做無賴囉!

對我來講,由於公司的保險唔包暴亂,瓜左冇得賠,我都唔敢走到最前,但成晚的情況我睇得好清楚。

警察面對示威者不斷衝擊,用手打、用腳踢、用棍扑、用鐵碼撞,都只係用胡椒噴霧同警棍對付,的確相當克制。後尾因為有十幾友衝破左最後防線到左萬麗酒店,差人先放催淚彈,我都食左幾啖,但我覺得佢地根本冇濫用武力。如果當時仲唔放,又或者按程序警告完先放(我其實聽唔到佢地有冇警告),期間就會有更多人衝破防線入會展,愈來愈多的圍觀市民亦唔會散,如果衝突再升級,就可能會搞出人命,到時真係不堪設想。

Picture

圖:食完催淚彈先戴得切口罩眼罩,但已經為時已晚!

其實我覺得今次成個會議,警察都表現得恰如其分,好克制。當然,南韓人都留有一手,佢地都只係要表達意見,無意搞到香港人。南韓人要做場show比世貿睇,警方奉陪,大家打幾場,南韓人表達左意見,警察亦成功守住防線,皆大歡喜。但關你班諸事八封的香港人乜野事先?!

我唔懷疑有D人真係明白世貿係乜野,同情南韓人的苦況,一齊遊行係絕冇問題。但人地去衝,你就唔應該跟住去,搞到示威者同警察打緊交之餘,仲要照顧你班用豆腐造的香港人有冇整親!

另外一樣奇既,就係每當示威者衝破差人防線,搶左差人盾牌,打傷差人,身為香港市民,唔幫自己人不特止,仲要為示威者拍掌歡呼!呢D係乜野心態?我知道乜野叫鋤強扶弱,但當有人衝擊緊香港人一直引以自豪的社會治安及秩序時,係咪仲要落井下石?係咪見到有差人死傷,所有示威者衝哂入會展,中斷會議,殺埋拉米,大家就最happy?就係最公平,最合理,最美滿的結局?

況且,我又唔係咁相信,個個支持南韓人的香港人,都知道自己支持緊D乜野囉!

人地南韓示威者,好似請左形象顧問同公關咁,PR做到足,扑完你幾棍後同你握哂手,搶左你D盾牌又完壁歸趙,示完威會執番垃圾,加上三步一跪拜的遊行方式,仲整多句唔鹹唔淡的"I love Hong Kong",的確令人好鬼感動。而從小處睇,我見過佢地食煙,煙灰係放入煙灰盒的,唔會學香港人周圍彈,所以我亦相信佢地多數係單純可愛,做既野都應該係出自真心的。

但香港人,你都唔使當佢地神咁,去到邊跟到邊,人地坐在草地食隻蕉都要圍觀影相,寫幾隻中文字又拍手歡呼下嘩?!你地真係知道南韓人的情況嗎?佢地係咪真係最慘的一群?佢地的政府,真係冇能力幫佢地嗎?知唔知世界仲有好多地方的農民比南韓人更慘,黎香港抗議都冇錢?示威人士中仲有好多來自其他南亞國家同非洲國家的農民,有冇人關心過佢地?而自己又為呢個世界付出過D乜野呢?係咪拍下手助下威,圍觀起哄影幾張相,世界的不公平情況就會改善呢?

定係因為睇韓劇睇上腦,當個個韓國人都係中宗,要講句小人敬畏呢?或者係示威者冇用刀冇開槍冇掉汽油彈,就義薄雲天,皇恩浩蕩,值得毫無保留的訓身支持?

其實傳媒都要負部份責任。好多人睇的生果報,就日日讚南韓農民點好點好,南韓工人點強勁,批評香港警察點弱雞,點驚惶失措;既鬧警察手段軟弱,又鬧警察過份暴力,你玩哂啦!其他報紙及電子傳媒亦多數只報南韓示威者的新聞,其他國家來的好少人理。

我都同意,香港警察只會在本地示威者、學生同記者面前發圍,對住黑社會就嚇到十二點後比人話哂事,對住大賊就槍都唔識開,追賊仔都會扭傷手腳,但一單還一單,今次世貿會議,警察的確做得恰到好處。

要鬧的,就只有星期六下午遊行時,點解D橫街放咁少防暴警察,比示威者一衝就過,搞到咁大劑。呢D係策略問題,經一事長一智,下次做好D。但傳媒係咪有需要不斷長他人志氣呢?

香港人的愚昧、無賴、羊群心理,一個世貿會議就表露無遺。

死喇,唔記得自己都係香港人,點算?


[2]

說得好。


[引用] | 作者 東邪黃藥師 | 7th Aug 2006 | [舉報垃圾留言]

[1] Viva HK Police

*Applause*
I think your blog is quite netural.  As I said, my brother is a police and I used to work in Police Force. So I have a preference / bias towards RHKPF is for sure. 

Viva HK Police~~!!!


[引用] | 作者 Poo | 7th Jan 2006 | [舉報垃圾留言]