香港新浪網 MySinaBlog
« 上一篇 | 下一篇 »
小彭 | 13th Jan 2007 | 新聞任我講 | (1517 Reads)

行政長官選舉三月舉行,呢半年來,特首係咪會競逐連任,特首能唔能夠成功連任,不斷成為記者關注的問題,近來甚至有點走火入魔!!

 

每次見到煲呔,我們例必會問佢幾時會公布係咪參選,呢個都係正常。但我實在能以接受,行家們將世界所有發生的大小事情,都同特首選舉拉上關係囉!!

政府收回GST建議,就有人問佢:「唔搞GST,係咪驚影響連任?」

特首上京述職,見左十幾個部委,亦有人問佢:「咁多部委見你,係咪支持你連任?」

中央公布送新的大熊貓來香港,都有人問:「送大熊貓比香港,係咪想提高你的民望,增加你連任的機會?」

中央公布內地金融機構可以來港發人民幣債券,又有人問:「中央擴大本港的人民幣業務,係咪想幫你在特首選舉做勢,幫助你連任?」

呢種問題已經發展到唔只問煲呔,就連唐英年等其他高官都照問!其實,你想佢地點答?

佢地難道真係會答你:「係呀,中央日日都幫我做勢架!!」??點解唔留返D機會問D更有意義的問題?

唔只記者,連學者都癲埋一份,樣樣都話係中央的大禮,係要幫煲呔連任!!

講真,特首為香港爭取利益,唔係好應該既咩?再講,在呢個八百人的小圈子選舉裡面,煲呔有可能輸既咩?有可能唔係大比數勝出既咩?唔通民主派在界別分組選舉中嬴到過百席,大家就天真得認為梁家傑真係可以在選舉中同煲呔有得鬥?我地幾時無啦啦相信左,呢個係一個真正的民主選舉,需要用政績來爭取選票?!

GST唔受歡迎,擱置係好正常;香港發生咁多同內地有關的問題,特首見內地部委亦係佢的責任;安安佳佳百年歸老,送過兩隻新熊貓有乜出奇;內地企業來港發債,互惠互利,有什麼大禮不大禮?!

再係咁落去,將來會唔會進展到......

「曾生,旺角道條水渠爆左,渠務署一小時內就到場,效率咁快,係咪想幫你爭取連任做勢?」

「曾生,警方在上海街捉左十名北姑,有效打擊罪案,係咪想提升你的民望,增加你連任機會?」

「曾生,隔離屋個三姑痾屎唔出,救護員十分鐘內就將佢送去醫院,係咪你的指示,要為連任舖路?」

睇黎愈近選舉,呢類無聊問題會愈來愈多,真係人都癲!!


[10] Re: 不連任,有可能嗎?
古 月 :
曾生有"阿公"撐腰,根本甚麼都不做,亦可以無風無浪地連任去..曾生有可能不連任嗎?理由呢,除了是他自己不幹,我也想不出理由來喔!

我諗佢當選後咁激動,係因為唔使再同梁家傑一齊做呢場原本冇必要做的馬騮戲而落淚!!


[引用] | 作者 小彭 | 31st Mar 2007 | [舉報垃圾留言]

[9] 不連任,有可能嗎?

曾生有"阿公"撐腰,根本甚麼都不做,亦可以無風無浪地連任去..曾生有可能不連任嗎?理由呢,除了是他自己不幹,我也想不出理由來喔!


[引用] | 作者 古 月 | 29th Mar 2007 | [舉報垃圾留言]

[8] Re:
米奇 :
政治新聞其實好鬼悶的,好心煲呔快些去選,唔好阻住地球轉.

係呀,政治好悶,但一定要知,因為政治同生活係分唔開的!!


[引用] | 作者 小彭 | 18th Jan 2007 | [舉報垃圾留言]

[7]

政治新聞其實好鬼悶的,好心煲呔快些去選,唔好阻住地球轉.


[引用] | 作者 米奇 | 17th Jan 2007 | [舉報垃圾留言]

[6] Re:
OLY :
特首會唔會連任成為時事焦點,證明香港啲記者比較懶、視野又窄,唔會去掘吓其他料囉!

咁又唔可以咁講既,好多記者都好叻好勤力,有時可能係老細一定要佢地撩話題o者!!


[引用] | 作者 小彭 | 16th Jan 2007 | [舉報垃圾留言]

[5]

特首會唔會連任成為時事焦點,證明香港啲記者比較懶、視野又窄,唔會去掘吓其他料囉!


[引用] | 作者 OLY | 16th Jan 2007 | [舉報垃圾留言]

[4] Re:
Angie :
haha 好搞笑 ...

哈哈,都幾架!!


[引用] | 作者 小彭 | 15th Jan 2007 | [舉報垃圾留言]

[3] Re:
維珍航空 :
講真呢o的無聊思維比我o既感覺係同o的無聊雜誌一樣, 唔需要去求真, 唔需要如實報導, 咁會好悶. 只要可以引起話題, 無無聊聊又一day都得ga la~
唉~ 想正正經經了解世事原來係咁難~ :<

身為有時都被迫要撩起話題的人,我只可以嘆句--唉!!!


[引用] | 作者 小彭 | 15th Jan 2007 | [舉報垃圾留言]

[2]

haha 好搞笑 ...


[引用] | 作者 Angie | 15th Jan 2007 | [舉報垃圾留言]

[1]

講真呢o的無聊思維比我o既感覺係同o的無聊雜誌一樣, 唔需要去求真, 唔需要如實報導, 咁會好悶. 只要可以引起話題, 無無聊聊又一day都得ga la~

唉~ 想正正經經了解世事原來係咁難~ :<


[引用] | 作者 維珍航空 | 14th Jan 2007 | [舉報垃圾留言]