呢篇文章可能會得罪好多人，但唔寫又谷住，都係唔理咁多，請大家多多包涵！！
近日熱爆的話題，除左電燈膽，相信就係樓價昂貴，醫生律師都話買唔起樓的問題。
一個女醫生打電話上電台節目，指佢同律師男友，買唔起樓，要特首「禁禁佢」；一對律師行合夥人，月入十萬，又話買唔起樓， 唯有用二萬蚊月租大坑單位。
好多人的反應，係「連律師醫生都買唔起樓呀，D樓貴到痴線架！！」我的反應卻係無名火起，好很反感！！
討論樓價貴唔貴，合唔合理，首先要問問自己，乜野價先叫做合理。有人認為九七年的樓價好唔合理，到左沙士，仍然有人覺得樓價唔合理，所以，為自己定下一個「合理」的「合理價」係好重要！！
對我來講，我會用一個十分膚淺的計算方式，來衡量樓價合唔合理，就係用同一個單位的九七高峰價，加零三沙士的最低價，再除二。 例如一個單位在九七年呎價五千，沙士時二千，咁我就會認為合理價應該係三千五。
留意過好多樓盤，依家的呎價，的確已經升過左我的合理價些少，用上面的例子計，已去到四千蚊，所以，我的結論係，依家的樓價係「偏貴」了。
但，係咪真係貴到，連醫生律師都買唔起？
打上電台果個女醫生，冇講自己的入息，只係掉低一句「連專業人士都買唔到樓」，佢咁講得出，潛台辭就係「連我呢D咁高人工的專業人士都買唔到樓呀」，所以我唔會考慮佢係咪一個搵唔到錢，人工低微的屋村醫生或實習醫生。
最基本的假設，佢係一個新入職的政府醫生，月入都有五萬幾。就當佢做律師的男朋友，完全冇底薪，完全冇生意，零入息，佢地的家庭收入都至少有五萬。五萬蚊同我講買唔到樓？
醫生話要「唔過海」，上一上中原網，要新要方便，北角港運城六百多呎單位，四百六十萬，用按揭計算機計一計，供七成，二十年，大P減三，月供都係一萬六千幾，剛佔醫生入息三分一。冇咁大舊首期咩？供九成半，三十年，月供都係一萬六千幾，首期只需廿多萬。
唔介意舊少少細少少，薄扶林置富花園五百多呎，二百七十萬左右，七成二十年，供一萬唔使，九成半二十年（舊樓未必做到三十年），供一萬三千幾，首期十三萬多D。買唔起？？？定係五、六百呎襯唔起你地身份？太細住唔慣？太舊睇唔起？提醒你，我未計你律師男友收入的！！
另外果個律師合夥人夫婦仲離譜！！講到明月入十萬，都話買唔到樓，即係有個有錢女同我講「呢個月零用錢使剩兩萬蚊咋，好鬼窮呀，買唔起新出個LV呀，慘啦，世界末日啦，死人啦」，我會即刻兜巴星佢！！
佢舉例的太古城七百萬單位，供二十年，按七成，月供二萬五，按九成半，月供都係三萬四，一個月入十萬完的家庭，供不起？用二萬蚊租一個大坑單位又租得起？？如果佢係因為比唔到首期的話，就要諗諗，做左幾廿年人（睇佢個樣都唔細），收入又咁高，都儲唔到個錢？係咪自己理財有問題？
最憎都係佢話「唔通仲叫我搭個幾鐘頭車，返去天水圍？」有冇搞錯，依家天水圍有乜問題？屯門、元朗、天水圍大把人住，呢D律師咪狗眼看人低囉！！
所以唔好再同我講乜野「當醫生律師都買唔起樓的時候，一般人又點買樓」、「當醫生律師都要住天水圍，一般人咪訓街」呢D說話，因為上面呢兩個例子，根本唔合邏輯，點可以用來做論據？！！
知唔知依家仲有好多人因為種種原因上唔到公屋，但又負擔唔起私樓，要住板間房？政府要幫都應該幫佢地先，你班醫生律師有手有腳人工高，但講到自己咁鬼慘，唔執輸要政府幫，等同向真正困苦的人爭福利，爭錢使，向佢地的傷口灑鹽，驚唔驚比雷霹？！
其實，佢地點解會認為自己買唔到樓？歸根究底，咪就係心頭高，唔肯屈就（其實都唔係好屈就），又怕買貴，怕買完就跌，唔想蝕，要嬴盡，要win哂。
一直話樓價貴，部份人其實由去年九月金融海嘯開始，講貴講到依家經濟似乎漸露曙光，期間樓市沉過一輪，係近半年先回升，點解低位時唔買？升返覺得走寶，唔抵，就係度嘈？
但問心，樓價回落，依家話買唔起的人，又係咪真係會買？
樓價回落時，聽唔少人講「依家買？傻啦，仲有得跌，跌多D先買啦。」到再跌多D，就會話「唉，都唔知跌到幾時，買左繼續跌，咪負資產？」到樓價反彈，佢地就會話「虛火o者，升一陣就會跌返，等下先」，唔跌繼續升，佢地又會覺得「唉，低價時唔買，依家升左先買，賺少咁多，好唔抵」，於是又等，等到今日，樓價升至偏貴的時候，就後悔，要政府幫了。咁同匯豐三十三蚊時唔敢買，驚再跌，到依家升返到八九十蚊時又dum心，要求政府「禁禁佢」有乜分別？樓，除左用來住，同時係一項投資，邊可能下下比你低買高放？眼光咁準，一早做左有錢佬，使乜o係度自怨自艾？點解大家覺得自己唔應該為自己的投資決定負責？
在佢地心目中，因為見過沙士的樓價，原來可以跌得咁低，所以認為只有跌到沙士價以下，先至合理。但，要明白，香港地少人多，樓宇價格點跌都有個譜，除非有大災難，先會大跌。當香港再有類似沙士的災難再臨，樓價又跌到五六十萬可以買淘大的時候，伴隨的會係乜野？咪就係百業蕭條，減薪裁員囉，仲會死好多人架，到時大家又會驚冇工開，又驚死，結果咪又係唔敢買、同更加買唔起囉！！
另外，又有人對燈膽權果句「買唔起市區，可以搬偏遠少少」好反感。我覺得，佢語氣可能涼薄，但，理性D諗，有講錯嗎？唔可以因為佢乞人憎，而一面倒認為佢講乜都係錯架喎！！
人因應自己的能力，買自己負擔到的東西，自古以來資本主義社會都係咁，點解套用在住屋上，會變成錯？
講真，我地呢D搵雞碎咁多，好過草根少少，仲同醫生律師呢D所謂中產，仲差好遠好遠好遠的打工仔，冇得住公屋，居屋又超過入息限額，無論沙士時同依家，買樓都唔易，要住港島，九龍市區，根本從來都冇可能。但如果一定要住，唯一選擇，就係睇餸食飯。
我同老婆，月入加埋都唔夠一個醫生多，零四年卻上了車。當時唔好話港島同九龍買唔到，就連沙田、馬鞍山呢D別人眼中比較方便的新界地區，都好「蚊水」。能力不夠，就要取捨。衡量交通、大細、新舊、價錢後，結果買左樓價平、樓齡新，但交通不太方便、面積比較細的元朗單位。
買左樓後，利息不斷升，愈供愈辛苦，但總算捱過，樓價升了一個不多不少的數目，於是零七年尾，我地用賣樓賺到的，用來比首期，搬了出青衣，今次交通比元朗方便得多，樓價卻一樣咁平，加上利息回落，供少好多，當然，在等價交易下，樓齡亦舊好多了。到了今日，呢層樓的樓價又升了幾十萬。當埋怨樓價貴埋怨了好幾年的人，依家仍然未買到樓的時候，我地已經開始諗緊，係咪可以再換間大D的單位了。
講真，我又唔覺我地為左間樓，而要放棄左生活質素囉，一樣旅行照去、車照養、仲有錢儲。
唔係話我地好醒好巴閉，但如果當年我地嫌A屋苑遠、嫌B屋苑舊、嫌C屋苑細、嫌D屋苑冇會所．．．．．．又驚買左會跌、份工會冇左，今日，可能我都係鬧爆燈膽權的市民之一，唔會有一個自己的安樂窩。
唔知係咪時下的第四代香港人，父母都有錢，食得好、住得好，到大個出來做野、買樓，間樓都要新、要大、要交通方便，最緊要係近父母！！住開新界的，比較易，但住開港島、九龍的，叫佢地搬遠少少，就好難。偏偏佢地好多都係一大學畢業就覺得自己應份要搬出來，應份要買到樓，政府應份幫佢地置業，但又心頭高，第一間樓就要三百萬以上的市區新樓先睇得上眼，舊D遠D都唔考慮，當然買唔到了。
其實，除左父母要照顧，或有仔女要父母幫手照顧之外，點解一定要住近父母？岩岩出來做野，點解唔可以屈就，先住間細少少、舊少少、偏遠少少，到賺到錢先再逐步改善生活？點解人人都想一步登天？！！
成日聽人講，「供三十年？咪一世同地產商打工？蠢人先買樓，我就租樓喇！」其實，除非你訓街，否則一定要住，一係買，一係租。如果買係同地產商打工，咁租何嘗唔係為業主打工？即使住公屋，咪又係同政府打工？！！可唔可以向另一個方向諗，供樓，其實都係一種儲錢的方式。供樓舊錢，部份係息，部份係本金，變相我每個月其實儲了錢入本金裡面。不要忘記，自己的物業，如果升了值，全數利益係自己的。但如果租，貴過我依家供樓好多，租金全數歸業主，業主仲可以隨時大幅加租，或迫你走，咁就麻煩。
講返轉頭，我一開始都認同左，依家樓市係偏貴，真正受影響的，係我地呢類高不成低不就，月入唔多又要交少少稅的打工仔，排隊都未輪到班醫生律師。如果真係想買樓，真係需要調整心態，諗偏遠少少的樓宇。生在香港呢個地少人多，地產主導社會的城市，只有無奈接受。等政府幫？蚊都訓啦！！
況且，政府其實又可以做什麼？
大家最普遍認為，政府應恢復定期賣地。我對經濟認識唔多，但我會諗，近期樓價升，係咪同土地供應有咁大關係？地產商話勾唔到地，都講左幾年，要升D樓就一早升，但樓市好似係呢半年先狂升。
即使政府恢復賣地，開價低，但如果樓市情況正面，餓地已久的地產商，都會爭相投地，結果成交價咪又係高？用天價投回來的地，你估唯利是圖的地產商，會唔會做好心唔用來起豪宅，賣比D唔知點解咁有錢的大陸客，而起中細價樓比我地班港燦打工仔？所以新樓呎價貴的情況，未必咁簡單可以改善。
既然大陸人炒貴哂D樓，咁唔比大陸人來港買樓得唔得呀？香港一直以來都係經濟自由開放的地方，任何人都可以來香港投資，香港先有今日咁繁榮，如果唔比外人買樓，咁第日車貴又可以唔比外人買車，奶粉貴又可以唔比外人買奶粉，咁其實算唔算計劃經濟？唔係話唔得，但係咪大多數市民都認同香港要走呢條路先？
再起居屋同夾屋？睇黎係最可以令我地低薪打工仔受惠的方法，只要唔係大量得推冧樓市，我會贊成。但咪住先，你地班大帝唔係話一定要住港島、九龍市區，交通方便地鐵沿線又大又新又實用又有會所兼夾文化藝術康體設施一應俱全的大屋苑咩？港島同九龍仲有冇咁多土地可以起大量居屋夾屋？要起，又係在新界區起，出中環要成半個鐘咁鬼耐，嘩，超級唔方便呀，你地會睇得上眼咩？
再出售公屋？咪玩啦，原因同上。仲有，公屋係比最有住屋需要的草根階層住（出現富戶係政策漏洞），如果轉為賣，個個霸住哂D公屋，輪候冊上的窮人點算？倒頭來又要起更多公屋，可以用來起私樓的土地更少，樓價咪又升囉！！
首次置業貸款？唔錯架，我有朋友都係用首置買第一層樓，近期又諗緊換大屋了！！不過，首置唔可以解決供應問題，但卻會引來更多置業需求，更多人有能力入市，結果會係點？自己諗下！！
咁，不如又黎多次八萬五丫？就因為你地要賤價買樓，要全港超過一百萬業主一齊受害，變負資產？我只可以話，你同希望沙士再臨的人的心地，一樣咁黑囉。全港七分一人變左負資產，你估我地仲有冇心情消費？到時內需急劇減少，餐廳冇人食，公司冇人行，經濟又回復大蕭條。最慘既係，你地到時又會返到「擔心繼續跌唔敢入市」的旋渦，沒完沒了。
近期亦有人建議，政府賣一D只可以用來起中低價樓的地，規定發展商唔可以起豪宅。可能呢個建議係比較可行。但我們要考慮，如果係咁，塊地一定唔多值錢，有冇人會投？除非，政府願意放寬地積比，許容發展商起更多單位。如果係咁，大家就要忍受，一幢又一幢的超高屏風樓，繼續在我們的城市中出現了。
咁，中產買唔到樓的問題，點先可以有效解決？我說過我不熟經濟，留返比懂經濟的人去諗了，如果有方法令中產買到樓，又唔會影響依家一百萬名私人樓業主，我一定舉腳贊成！！
而我只係覺得，方法根本一直存在，就係「冇咁大個頭，就戴頂細D既帽」囉，只係大家唔願意接受o者。要近市區，咪揀間細D舊D囉，要新要大，咪入新界西囉，其實香港有幾大o者，唔好講到屯門出中環，好似LA去紐約咁先得架！！
呀有，最後比我諗到一個方法，一定得！！就係由政府起樓，免費比我地住！！唔好以為冇可能呀，移民北韓啦，景鴻幫到你！！
