香港新浪網 MySinaBlog
« 上一篇 | 下一篇 »
小彭 | 5th May 2006 | 我寫故我在 | (3358 Reads)

平均分: 10.00 | 評分人數: 1

作為電台記者,成日都要扑咪,最怕的,就係做街訪,尤其是做香港人的街訪。

做外國人,甚至內地人的街訪,不論在香港或外地,問十個有九個肯答,講既野大部份都有紋有路,通常能答中問題的核心,比到個好的soundbite,皆大歡喜。不肯答的,態度也通常良好,會講句「唔好意思」(其實佢冇義務一定要答我,唔使唔好意思)。

但訪問香港人,十個有五個,一見你遞支咪出來,就會露出驚慌的神色,不論你說什麼,都像見鬼,調頭就跑,頭也不回。一係就超你兩眼,然後態度惡劣的話「唔好問我」。

剩低的五個,有兩個會聽完你的問題,但立即會話「我趕時間」,然後就走。另外兩個肯停下來答你的,通常都係你問十句,佢只會答「係」、「唔係」、「唔知呀」、「唔識呀」、「哈哈哈哈哈......」、「哈哈哈哈哈,你問第二個啦」、「我未睇新聞喎」(我的問題已經將成單新聞講左比你聽!)......。剩下最後的一個,才會比到一個ok的soundbite,可以用來出街,講得有紋路的,差不多係零。

其實幾唔明,香港人普遍受過九年免費教育,點解即使係中環的白領,定係名校的中學生,都仲係咁怕同記者講野,咁難講到句完整的說話,咁喜歡以笑遮醜,咁喜歡用令人討厭的態度對人。講真,就連北京的一個街頭小販都不如。

另外一樣最厭惡性的,就係去街市訪問商販。每有食物衛生問題,我們都要去街市訪問他們生意是否受影響、會否調整價錢等等。

個人最怕做雞販訪問,因為搵親佢地做訪問,少不免唔係好野,一係就有禽流感,一係就減少輸入內地活雞。所以在佢地生意少同心情唔好時問佢地,預左有難度,但都唔使搵我地出氣吧! 我地做電台都好D,電視台的記者,由於有攝錄機,一影雞檔,未遞咪做訪問,雞販們就會發癲,有D仲會拿刀出來作勢斬人,一個唔覺意,真係命都比埋佢!!

講開電視台,香港人仲有一個好奇怪的習性,就係非常極度嚴重恐懼鏡頭。

有好多時,我地同報紙記者訪問緊一個被訪者,一路都好地地,但當電視台一加入,被訪者就會發瘋的逃避鏡頭,甚至連訪問都會被中止。

有D人仲搞笑,當我表明自己係電台記者,一遞咪,佢地都會左閃右避,猛話「唔好影、唔好影」,吹脹!! 呀哥仔姐仔,我係電台記者,個咪都寫到明,我係唔需要影相的,你閃咩o者!! 不過講開又講,港台依家要影相同拍video,見到港台先閃啦好冇?!!

另外,有時我地一班記者在某處地方等某些官員做訪問,官員未到,大家正在休息之際,路過的途人,見到攝錄機,好多都會用手遮面、或是先露出錯愕表情,然後woo低身急急走避,我們看在眼裡,只覺好笑!!

路人甲乙丙們,電視台攝錄機的電池係好快用哂的,如果你唔係我地要訪問的人,我地係唔會無啦啦晒電去影你地。同埋,當攝錄機運作時,正常情況下一定會著住一個紅燈,到時先遮面都未遲。

不過講真,如果唔係做左衰野,上鏡又有乜好怕喎?!! 每逢年宵行花市時,路人們唔係好鍾意在鏡頭前跳上跳落整V字手勢既咩? 點解平時又咁驚??

話說回來,市民咁驚記者,可能有部份係受近年狗仔隊偷拍的風氣影響。

市民應該分清楚,從事偷拍、跟蹤、影人走光等行為,是娛樂狗仔隊做的,不是港聞記者。我都好睇唔過眼狗仔隊的行為。

不過,試諗諗,如果你係普通人一個,唔係明星,唔係名人,唔係賊,毫無新聞價值,狗仔隊點會花時間影你? 有乜好驚?

下次見到記者訪問,你可以唔答,但反應唔使咁誇張,做人優雅少少,大家都舒服!!


[30] Re:
紫熊 :
印象中好似我又冇遮面. 不過, 我咁靚女, 會唔會有人偷影我呢. hehe.

咁又唔使擔心喎,遇到靚女,攝影師一定即影,因為報紙鍾意登靚女相!!講真架!!


[引用] | 作者 小彭 | 21st Dec 2006 | [舉報垃圾留言]

[29]

印象中好似我又冇遮面. 不過, 我咁靚女, 會唔會有人偷影我呢. hehe.


[引用] | 作者 紫熊 | 20th Dec 2006 | [舉報垃圾留言]

[28] Re:
紫熊 :
我偶然來到架. 覺得你好多文章都寫得一針見血呢.
不過, 就呢一篇, 我有少少想澄清. 你話等官員個陣, 途人急急走避. 我都做過個類途人好幾次呀. 雖然我唔敢講話我心裡唔係唔想出鏡. 但係我真係諗住唔想阻記者朋友做野. 我係途人, 唔知官員幾時出現, 如果我慢慢行, 到時官員一出現, 唔通你想影我遮住官員咩? 定係等到時你地你喝令我好快d 走開? 所以見你咁講,覺得有點怨枉呢~

哈哈,我唔係講你呢種情況呢!!你咁合作,我地冇異議呢!!

我講緊的係怕鏡頭怕得遮面果D!!


[引用] | 作者 小彭 | 19th Dec 2006 | [舉報垃圾留言]

[27]

我偶然來到架. 覺得你好多文章都寫得一針見血呢.

不過, 就呢一篇, 我有少少想澄清. 你話等官員個陣, 途人急急走避. 我都做過個類途人好幾次呀. 雖然我唔敢講話我心裡唔係唔想出鏡. 但係我真係諗住唔想阻記者朋友做野. 我係途人, 唔知官員幾時出現, 如果我慢慢行, 到時官員一出現, 唔通你想影我遮住官員咩? 定係等到時你地你喝令我好快d 走開? 所以見你咁講,覺得有點怨枉呢~


[引用] | 作者 紫熊 | 18th Dec 2006 | [舉報垃圾留言]

[26] Re:
Cherrie :
我好鐘意你遞支咪去佢同你講唔好影你個表情實好灰~hahahahahaha~
我次次都肯做訪問呀, 電視台都照做架...不過佢有無播出黎其實我唔知...無去追究, 不過大約知記者想我答咩方向, 就會講講講, 等佢自己去cut囉...

我當時的表情,係唔知好嬲定好笑囉!!

如果我地遇到的被訪者,個個都好似你咁合作,就太好了!!


[引用] | 作者 小彭 | 1st Dec 2006 | [舉報垃圾留言]

[25]

我好鐘意你遞支咪去佢同你講唔好影
你個表情實好灰~hahahahahaha~

我次次都肯做訪問呀, 電視台都照做架...不過佢有無播出黎其實我唔知...無去追究, 不過大約知記者想我答咩方向, 就會講講講, 等佢自己去cut囉...


[引用] | 作者 Cherrie | 1st Dec 2006 | [舉報垃圾留言]

[24]

我諗我真係遲左好多,但我好想講,我寧願做4個研討會,再聽3個PANEL,同兩個冗長的立法會會議,都唔想執1個街訪T~T


[引用] | 作者 妹梅+傻妹穎 | 28th Aug 2006 | [舉報垃圾留言]

[23]

我想知道更多事物
了解更多事物
栛助自己幫幫自己解開自己心病


[引用] | 作者 Sarah | 9th Aug 2006 | [舉報垃圾留言]

[22]

雖然我已離開了新聞界一段時間,不過一看到這個題目,都八掛入來看看,作為一個前財經記者,我也曾經有過扑咪經驗,但可能財經的要求不一樣吧,所以比較容易,加上那些股民都非常健談,還不時和我交流股經,好似聊天一樣,很多時候他們都是好好笑的,我指他們的bite。比好多名人的更到肉。
dream catcher


[引用] | 作者 Dream Catcher | 31st Jul 2006 | [舉報垃圾留言]

[21]

好想報以一個會心微笑~~


[引用] | 作者 luke | 27th May 2006 | [舉報垃圾留言]

[20]

路過發現你的網誌,打擾了;-)

現在才來加入談這個,好像太晚了。只可以說,做報紙的都好不到那裡去。雖然要bite的標準與你們不一樣,可以用文字遷就一下。

不過,除非係街市(或者應該說「就算係街市」),但係街訪無後生女就大件事。唔該做到有先返公司。


[引用] | 作者 diana | 24th May 2006 | [舉報垃圾留言]

[19]

小蓓:
呢個世界係咁現實架啦,大台收視率高嘛,到時佢先可以有多D師奶朋友睇到,有得威威!!

Trudy:
我扑咪第一句一定好禮貌,但如果個被訪者冇禮貌,我就會即時變瞼,哈哈!!

阿旺:
相信你係姓鄧的,係咪??
我冇你咁揀擇,不過如無必要,一定唔會扑後生仔女,因為學你話齋,佢地個個都一係懶得戚,一係驚記者驚到傻左,好少有人認真答你同比到好bite!!


[引用] | 作者 小彭 | 11th May 2006 | [舉報垃圾留言]

[18]

大家講得咁開心,我又講下先!入行以來,最怕扑街咪,完全同意香港人對記者扑咪的恐懼,已經到左失控地步……

最經典一次,下午五時係中環,老細叫我搵學生或家長評論教育政策,天呀,中環已經難扑,仲要係太子大廈搵學生哥!!(我本身係個度幫自己扑緊街咪)

唯有向家長埋手,埋親每個都晒手擰頭,十問九唔應,老細越催越急(因為係頭條),後來見到有個女人拖住個細蚊仔,機會黎啦……

我上前問佢,佢例牌拒絕,我終於忍不住,大聲少少咁話︰我想問你一d關於子女教育的事,你可唔可以答一答……

我份人又好衰,扑咪好揀擇︰

阿伯唔扑—怕長氣同九唔搭八

哥哥仔唔扑—個個都懶得戚

OL唔扑—個個一見到cam就大嗌,話嚇死佢,我通常會回贈一句︰你叫得咁大聲,好似我被你嚇親多d 喎!

有時d人又會扮聽唔到,我又會大大聲話︰佢聾架!

而家離開左前線,如果有日你地扑咪時見到我,就搵我幫下手啦!


[引用] | 作者 阿旺 | 10th May 2006 | [舉報垃圾留言]

[17]

本人已離開新聞界超過一年半, 但對於扑咪的工作, 實在難忘. 被人拒絕的經驗, 大家都有, 不重複了. 反而可以講下點樣先至成功搵到好bite. 我在商台扑咪的次數, 平均而言, 三日一次啦.

搵對對象, 好有禮貌咁表示自己係商台記者, 報上自己姓氏, 等對方知道自己係邊個. 跟住話, 有些東西想請教下你的意見或睇法. 由於對方由本來好驚到冇咁驚, 就會願意聽你的問題, 已經係成功的第一步. 通常佢都唔會好明你問咩, 又或者, 好明d唔明d, 那麼就重問. 等對方有了初步答案後, 通常都係散落的"係呀", "唔係呀", 到了這時我就會邀請對方, 或者你再組織下再講, 唔急ga, 慢慢來(或者當時其實已經係5:45!!), 等對方在冇壓力的情況下表達, 佢會講得好d, 你都唔使剪得咁辛苦啦.

當然, 揀對象就一定要以貌取人, 著得整齊d, 光鮮d, 取得好bite的機會會大增.

我自己唔算喜歡扑咪, 但未算討厭, 可能, 每次扑咪的經驗還可以吧.


[引用] | 作者 trudy | 9th May 2006 | [舉報垃圾留言]

[16]

見大家咁有意見,我又要加入!應該唔會太遲啩...

同美寶一樣,最怕幫同事扑咪.
大家都知弊台有啲阿姐寫故仔,心入面一早寫定份稿,然後要你一定要扑到果個答案先叫做扑到咪.

譬如話,佢份稿話"有市民反對地鐵加價,認為即使加幾毫,都會增加佢地平日的洗費.去BITE"

結果你一定要扑到個反對兼係話加幾毫都唔好的BITE.最慘你扑極都扑唔到.大姐呀,咁你要扑人地反應,人地贊成都唔俾咩???人地贊成你咪改過份稿囉,你點做記者架!!! 頂!!!

唔知點解,近呢一兩年尤其討厭扑街咪.同camman研究過,覺得自己面皮越嚟越薄,實在經唔起人地白眼兼派食檸檬.唉...

上個禮拜有個幾搞笑的經歷,小妹去荃灣樓盤扑咪,有個師奶本來想答我,點解一睇我個咪牌就話"下,乜唔係無線...我唔得閒呀",當時我真係俾佢吹到啤啤聲!乜扑咪都有分邊個台答邊個唔答架咩???


[引用] | 作者 小蓓 | 8th May 2006 | [舉報垃圾留言]

[15]

哈,冇計啦,香港人自我保護意識太強.平時成日聽同事講佢地做街訪的慘況,已經覺佢地好慘.好彩咁耐以黎,我都未做過咋,哈!


[引用] | 作者 chacha | 8th May 2006 | [舉報垃圾留言]

[14]

Angie:
咁你就錯啦,攝記影呢D天氣相,一定會影靚女,唔靚唔影同唔登架!!所以佢地影得你,證明你係靚女,唔使咁驚喎!!
即使做街訪,報紙記者都會盡量搵靚女,佢地話老細鍾意!! 所以如果人地搵你做街訪,你唔好拒絕啦!!


[引用] | 作者 小彭 | 8th May 2006 | [舉報垃圾留言]

[13]

小彭,其實我係街見到d記者拎住d相機都有d驚,因為好怕無端端做左蘋果日報既「夏日春光」、「天氣下降」、「xx掠影」的主角,好老土,佢地唔樣衰唔登架!


[引用] | 作者 Angie | 8th May 2006 | [舉報垃圾留言]

[12]

nana:
你講個case咁似我既?!
我當年就係比某某阿姨叫我去扑咪,要搵D受過工傷的,仲叫我入去人地酒樓的廚房搵,真係吹到啤一聲!! 如果我真係入去,到時我就真係工傷了!!

結果佢都係要聽我講,搵soco等機構幫我地搵case,仲快手!!

話時話,今日見美寶小姐扑的醫院咪,真係搵中年男人喎,D bite又真係唔差喎!!哈哈!!!


[引用] | 作者 小彭 | 8th May 2006 | [舉報垃圾留言]

[11]

其實電台已經算好
如果係電視台?仲難扑咪


[引用] | 作者 poonwinghang | 7th May 2006 | [舉報垃圾留言]

[10]

美寶講開"滿足多個要求"的街byte, 不禁令na想起本台同一版本的故事.....
就係去扑個咪,要做廚房, 受過工傷, 仲要無得賠, 去邊度搵? 老細話, 樂富地鐵啦!
企一日都未必有啦!
呢個故事, 相信早幾年在本台共事過的, 無乜邊個唔知.....
簡直反面教材!
咁即係搵case, 係咪可以搵得聰明d? 正如美寶個案,佢同事應找地產代理幫手, 唉! 你估真係隨街都執到寶咩!


[引用] | 作者 na | 7th May 2006 | [舉報垃圾留言]

[9]

據我粗略估計
我做的assignment
平均每五單就有一單要扑街咪.
未計唔係我自己做o個o的wor.

我都唔知點解.
計我話.除左九龍城玲姐.
冇一個地方係易扑街咪的.

通常見我心情差o個日
我就多數都係扑完街咪.

我試過俾個肥佬一手撥開我.
係ok 大力o個隻
搞到我同佢嗌交.
我話.你駛唔駛咁冇禮貌.
佢仲要話我阻住佢條路.
我話我冇迫你答架wor.
你一句話唔答咪得.
佢仲要話我lur 住佢.
但係我係連條問題都未問完!!!

呀! 我最憎去樂富扑咪.
十個咪都未必有一個好用.

講起個人都燥左law


[引用] | 作者 maggggie | 7th May 2006 | [舉報垃圾留言]

[8]

扑街咪,令人討厭的assignment之首
小妹無各位咁多經驗,知道那個區難扑或者易扑
但係至討厭那些似乎想答又唔答的人--
明明想high profile,打到黎時又縮沙
唔該「答就企定,唔答就借借」


[引用] | 作者 Ada | 7th May 2006 | [舉報垃圾留言]

[7]

嘩,估唔到咁多人有共鳴!!其實應該估到!!

na, 聰:
好同意,香港人驚表達,同教育都有好大關係!!我自己都係其中之一個受害者,要我對住一大班人講野,都有點手足無措!!

joyce, jacky:
係呀,中環的白領人,部份真係幾討厭。無論幾一表人才,一對住個咪,就露哂底,男男女女都係「哈哈哈哈哈...唔好問我,唔好影我,哈哈哈哈哈,問第二個啦...」,救命!!

美寶:
應該唔關你市場定位事,因為我都較鍾意扑中年男人,佢地始終經過較多人生歷練(唉,扑個咪都要人生歷練?!),比到好bite的機會較大。
講真,扑咪真係冇乜代表性,相信老細都唔會認為有,不過老細覺得電子傳媒故仔有一兩個街訪,會「好聽」D。某程度上,我是認同的,但不應過火,迫人扑到岩佢心意為止先收手囉!!


[引用] | 作者 小彭 | 6th May 2006 | [舉報垃圾留言]

[6]

最憎D人懶忙 明明無野做係度等人 所以我先過黎問你
一開口問就話自己好忙 然後我又見你無所事事繼續等
唔做咪唔做囉 駛唔駛講埋D咁無謂的理由先
好認同在中環仆街咪是一百個煩 好眉好貌著得端莊 企定講兩句唔駛死呀嘛
我試過問施政報告 佢地要求最少有十個bite 全部要用得著 我用左差唔多一個鐘 見人都問先問到 頂佢
但重點是 我又唔覺得街訪真係好有代表性囉


[引用] | 作者 jacky | 6th May 2006 | [舉報垃圾留言]

[5] 憎爆

街訪 - 簡直憎到爆 !
到底老細有無想過,其實街訪的真正目的何在 !?
問牛頭角順嫂 - 「你阿媽係咪女人」...簡直廢爆 !
幫同事扑街訪更憎 !
試過一次同事要我在街上扑一個咪..指明要滿足多個條件,包括1. 是業主
2. 近期放盤
or
1. 租客
2. 近期因業主收番樓,逼住要搵過個單位...
若果給我半日時間...或會找到
但當時 是五點半 !
點搵呀 !?
若果咁都比我搵到,我不如改行做地產啦 !
結果..我扑唔到...然後同事話因為沒有街訪...個故仔起唔到 !
我丁頁 !
請問如果個故仔有料到...點會因為欠個街訪就出唔到街 !?
那一次...換來一次照肺的經驗 !

希望大家諗諗到底街訪的目的...

而近期我較傾向問中年男人...
唔...可能同我的市場定位有關...(有點可悲 !)


[引用] | 作者 歐巴桑美寶 | 6th May 2006 | [舉報垃圾留言]

[4]

扑咪最難區域--中環!!!!
著得好光鮮的,偏偏就最冇禮貌!
喺街扑咪已經係一件好傻嘅事,試過等扑街咪,一西裝友同一班OL lunch time,見你喺喥扑咪,又要多口指住個 friend 話「問咩呀,問佢啦問佢啦」見佢咁積極,就叫埋去問嗰位西裝友,點知佢一見我向佢行,佢即走住話「唔好影我,唔好問我呀」吹賬!!

bite最爛區域:旺角
MK 年青男女,見鏡頭已左避右避,就算俾你埋到身,都係遮遮掩掩,問一句,就答一句"唔知呀,唔知喎"


[引用] | 作者 jOyZzz | 6th May 2006 | [舉報垃圾留言]

[3]

學生在學校從不被鼓勵發言,
細細個返學,
最常聽到老師話"唔好傾偈/唔好嘈",
媽媽又會叫你"唔好駁咀",
咁情況長大,
你叫香港人點可以有紋有路表達心聲??
所以在香港做街訪, 真係好要技巧, 大家努力練習, 同自閉香港人搏鬥!


[引用] | 作者 na | 6th May 2006 | [舉報垃圾留言]

[2]

作死呀,見港台即閃?!咁我唔駛撈啦!!

香港人拍記者,除了狗仔隊效應外,絕對跟那填鴨式教育制度有關。中小學生根本毋須學習表達自己,所以高考成績考到識飛,入到大學隨時repeat。

最討厭的,是一些廿零三十歲的男人,連你個問題係乜都未知,就叫你過主,態度惡劣。仲有一次,俾個司機屈我偷錄(在畸寶那時),結果俾我鬧到佢扒低,搞到佢講對唔住,詳情可看我寫「記者過街老鼠」一文。

去年到北大做連戰演講,事後求其問了四個學生感想,那些bite......多到用唔晒!!!


[引用] | 作者 gunners | 5th May 2006 | [舉報垃圾留言]

[1]

哈哈,敝台最喜歡做街訪,好彩我好耐未做過


[引用] | 作者 Sun | 5th May 2006 | [舉報垃圾留言]